Souwuel grouss Evenementer,wou dat klengt Lëtzebuerg an der Weltgeschicht matgemëscht huet, bis zu de Probleemer a Suerje vun de klenge Leit versicht de Film – aus der Siicht vun der Buerg Clierf an dem Eisléck – en historesche Bou ze spanen.

Zum Deel onveröffentlecht Quellen, Archivmaterial, Dokumenter an original Opnamen ënnermauren e sëlleche Spillszeenen, déi dat dacks haart Liewe vun deemools op eng realistesch Manéier erëmspigelen.

Iwwer 800 Acteuren, Statisten, Fachleit a Mataarbechter hu gehollef, dëst liewegt Billerbuch an Zeit vun iwwer 2 Joer ze schafen. D’Buerg Clierf, déi an hirer laanger Geschicht vill Stierm, Kricher, Misär, Héich-an-Déifpunkten erlieft huet, steet an dëser mouvementéierter Zäitrees stellvertriedend fir vill aner Plazen am Land, wou ongeféier déiselwecht Zwëschefäll, Ausernanersetzungen, Streidereien an Drame passéiert sinn.